కరీంనగర్‌కల్చరల్‌: నగరంలోని సెయింట్‌ మార్క్‌ చర్చి గ్రౌండ్‌లో శుక్రవారం సీఎస్‌ఐ సంఘాల ఆధ్వర్యంలో క్రైస్తవ ఉజ్జీవ మహాసభలు ప్రారంభమయ్యాయి. జాతీయ, అంతర్జాతీయస్థాయిలో విశేష ఆదరణ కలిగిన బ్రదర్‌ జెన్నీ క్రిస్టాఫర్‌ మాట్లాడుతూ క్రీస్తు చూపించిన మార్గంలో నడిస్తే భూమి భూపల స్వర్గం అవుతుందన్నారు. ఈ కార్యక్రమంలో రూబెన్‌ మార్క్‌, ప్రిసిల్ల పరిమళ రూబెన్‌ మార్క్‌, పాల్‌ కొమ్మాలు, ఎస్‌.జాన్‌, ఆర్‌.ప్రసాద్‌, బి.ప్రసాద్‌, ఎ.మధుమోహన్‌, డీకన్‌ పింటు, డీకన్‌ రోజి, రెనాల్డ్‌, పాస్టర్‌ తిమోతి, పాస్టర్‌ క్రిస్టొఫర్‌, ఇండిపెండెంట్‌ పాస్టర్స్‌, స్థానిక సంఘాల పెద్దలు, ఇవాంజిలిస్ట్‌లు పాల్గొన్నారు.

ఇల్లందకుంట: భూమిలో నవధాన్యాలు చల్లుకుంటే ఎంతో మేలని భారత సుస్థిర సంస్థ క్షేత్ర సహాయకుడు రావుల రాకేశ్‌ అన్నారు. శుక్రవారం ఇల్లందకుంట మండలం రాచపల్లిలో పెనుకుల దేవేందర్‌ వ్యవసాయ క్షేత్రంలో సంస్థ ఆధ్వర్యంలో నవధాన్యాలు చల్లారు. ఈ సందర్భంగా ఆయన మాట్లాడుతూ.. నవధాన్యాలు వేసుకోవడం వల్ల భూమి లో సేంద్రియ కర్భనం పెరుగుతుందని తెలిపారు. గొర్రెలు, పశువుల ఎరువు, చెరువు మట్టి చల్లితే సూ క్ష్మజీవుల సంఖ్య పెరిగి, నేల సారవంతం అవుతుందని పేర్కొన్నారు. వరి కొయ్యకాలును కాల్చడం వ ల్ల భూమికి మేలు చేసే సూక్ష్మజీవులు చనిపోతాయ ని, కాల్చకుండా నేలలోనే కలియదున్నాలని సూచించారు. సంస్థ సభ్యులు పాల్గొన్నారు.

● ‘పీఎం కిసాన్‌ నిధి’ కింద ఏటా రూ.6 వేలు ఇస్తున్న కేంద్రం ● ఐదేళ్లుగా కొత్త రైతులకు అందట్లే.. ● వ్యవసాయాధికారి కార్యాలయం చుట్టూ ప్రదక్షిణలు ● కరీంనగర్‌ మండలంలో పరిస్థితికరీంనగర్‌రూరల్‌: కేంద్ర ప్రభుత్వం రైతులకు పంట పెట్టుబడి సాయాన్ని అందించేందుకు ప్రధానమంత్రి కిసాన్‌ సమ్మాన్‌ నిధి యోజన ప్రారంభించింది. ఐదెకరాలలోపు ఉన్న భూమి ఉన్న రైతులకు ఏటా మూడు విడతల్లో రూ.2 వేల చొప్పున మొత్తం రూ.6 వేలు వారి బ్యాంకు ఖాతాల్లో జమ చేస్తోంది. అయితే, ప్రభుత్వ నిబంధనతో కొత్త రైతులకు పెట్టుబడి సాయం అందని ద్రాక్షగా మారింది. 2019 ఫిబ్రవరి 1 వరకు కటాఫ్‌ తేదీగా నిర్ణయించడమే ఇందుకు కారణం. 2019 తర్వాత భూములు కొనుగోలు చేసి, కొత్త పట్టాదారు పాసు పుస్తకాలు పొందినవారు సమ్మాన్‌ నిధికి దరఖాస్తు చేసుకున్నప్పటికీ పెట్టుబడి సాయం మంజూరవడం లేదు. పలువురు రైతులు వ్యవసాయాధికారి కార్యాలయం చుట్టూ ప్రదక్షిణలు చేస్తున్నప్పటికీ ప్రయోజనం లేకుండా పోయింది. 656 మందికి రావట్లే.. కరీంనగర్‌ మండలంలో మొత్తం 5,250 మంది రైతులు కిసాన్‌ సమ్మాన్‌ నిధి కింద ప్రయోజనం పొందుతున్నారు. మొదటి విడతలో 6,322 మందికి సాయం అందింది. తర్వాత కేంద్ర ప్రభుత్వ నిబంధనల కారణంగా ఆ సంఖ్య 5,250 మందికి తగ్గింది. అయితే, పలువురు రైతులకు సరైన అవగాహన లేకపోవడంతో సాయానికి నోచులేకపోతున్నారు. ఆధార్‌ నంబర్‌కు మొబైల్‌ నంబర్‌ లింకేజీ చేయకపోవడం, పీఎం కిసాన్‌కు ఒకటి కంటే ఎక్కువ ఫోన్‌ నంబర్లు లింక్‌ చేయడం, రద్దు చేసిన బ్యాంకు ఖాతాలను తొలగించకపోవడం, బ్యాంకు ఖాతాలకు ఆధార్‌ లింక్‌ లేకపోవడం, ఈ–కేవైసీ చేసుకోకపోవడంతో పెట్టుబడి సాయానికి దూరమవుతున్నారు. ప్రస్తుతం 656 మంది రైతులకు పలు కారణాలతో పెట్టుబడి అందడం లేదు. గైడ్‌లైన్స్‌ విడుదల చేయలేదు కేంద్ర ప్రభుత్వం పీఎం కిసాన్‌ సమ్మాన్‌ నిధి యోజనలో కొత్త రైతుల వివరాలను నమోదు చేసేందుకు గైడ్‌లైన్స్‌ విడుదల చేయలేదు. 2019 కంటే ముందు పట్టాదారులైన రైతులకు మాత్రమే డబ్బులు మంజూరవుతున్నాయి. విరాసత్‌ పొందినవారికి అవకాశముంది. కటాఫ్‌ తేదీ తొలగిస్తే కొత్త రైతులకు లబ్ధి చేకూరుతుంది. – బి.సత్యం, మండల వ్యవసాయాధికారి, కరీంనగర్‌

కరీంనగర్‌సిటీ: నగరంలోని మంకమ్మతోటలో గల శ్రీచైతన్య డిగ్రీ, పీజీ కళాశాలలో శుక్రవారం మెడికో హెల్త్‌ కేర్‌ సర్వీస్‌ కంపెనీ నిర్వహించిన క్యాంపస్‌ డ్రైవ్‌లో 21 మంది విద్యార్థులు ఎంపికై నట్లు కళాశాల చైర్మన్‌ ముద్దసాని రమేశ్‌రెడ్డి తెలిపారు. 110 మంది చివరి సంవత్సరం విద్యార్థులు పాల్గొనగా వివిధ దశల్లో జరిగిన ఎంపిక ప్రక్రియలో 21 మంది ఉద్యోగాలు సాధించారని, వారికి వార్షిక వేతనం రూ.2.5లక్షలు ఉంటుందని అన్నారు. విద్యార్థులకు ఉద్యోగ కల్పనే ధ్యేయంగా తమ సంస్థ పనిచేస్తోందని, ఏటా దాదాపు 100 మంది వివిధ బహుళ జాతి సంస్థలకు ఎంపిక కావడమే దీనికి నిదర్శనమన్నారు. ఈ కార్యక్రమంలో కళాశాల ప్రిన్సిపాల్స్‌ ఎల్‌.శ్రీనివాస్‌, వి.స్వర్ణలత, వైస్‌ ప్రిన్సిపాల్‌ కృష్ణారెడ్డి, కళాశాల సిబ్బంది, కంపెనీ ప్రతినిధులు, విద్యార్థులు పాల్గొన్నారు. గ్రానైట్‌ అసోసియేషన్‌ అడ్వయిజరీ కమిటీ ఎన్నిక కొత్తపల్లి: గ్రానైట్‌ ఇండస్ట్రీస్‌ అసోసియేషన్‌ జిల్లా తాత్కాలిక అడ్వయిజరీ కమిటీ సభ్యులను ఎన్నుకున్నారు. కొత్తపల్లి మండలం ఎలగందుల పంచాయతీ పరిధిలోని గ్రానైట్‌ ఇండస్ట్రీస్‌ అసోసియేషన్‌ కార్యాలయంలో శుక్రవారం సభ్యులు సీహెచ్‌.శ్రీనివాస్‌, మధుసూదన్‌, అడ్డకేట్‌ వేణుగోపాల్‌ల ఆధ్వర్యంలో నిర్వహించిన సర్వసభ్య సమావేశంలో 18 మంది సభ్యులతో కమిటీని నియమించారు. జిల్లా గ్రానైట్‌ ఇండస్ట్రీస్‌ అసోసియేషన్‌కు ఎన్నికలు జరిగే వరకు ఈ వర్కింగ్‌ కమిటీ పనిచేస్తుందని వారు ప్రకటించారు. అసోసియేషన్‌ సభ్యులుగా జువ్వాడి ప్రణీత్‌రావు, నరేన్‌ రాచకొండ, బూర సాగర్‌, గుడిపాటి సుదర్శన్‌రెడ్డి, విక్రం, టి.సతీష్‌రావు, పెద్ది సత్యనారాయణ, సోమినేని కనకయ్య, జుట్టు మధు, కె.సత్యనారాయణరెడ్డి, సోమినేని కరుణాకర్‌, ఆర్‌.మహేశ్‌కుమార్‌, షేక్‌ భాష, సిరి గోపాల్‌, సాగి సాగర్‌రావు, ఆర్‌.రామ్‌భూపాల్‌ రెడ్డి, టి.శ్యాం రావు, ఈశ్వర్‌రెడ్డి దువ్వాడిలు ఎన్నికయ్యారు. గడువు దాటిన స్టాక్‌ విక్రయించొద్దు చొప్పదండి: మండల కేంద్రంలోని విత్తనాలు, ఎరువుల దుకాణాలను డీఏవో శ్రీనివాస్‌ శుక్రవారం తనిఖీ చేశారు. ఎరువులు, విత్తనాల స్టాక్‌ను పరిశీలించారు. ఈ సందర్భంగా ఆయన మాట్లాడుతూ.. గడువు దాటిన స్టాక్‌ విక్రయిస్తే చర్యలు తప్పవని హెచ్చరించారు. విత్తనాలు, ఎరువుల వివరాలను ఎప్పటికప్పుడు స్టాక్‌ రిజిస్టర్‌లో నమోదు చేయాలని సూచించారు. ఆయన వెంట ఏవో వంశీకృష్ణ, డీలర్లు ఉన్నారు. వీరబ్రహ్మేంద్రస్వామి ఆరాధనోత్సవాలు హుజూరాబాద్‌: పట్టణంలోని పోతులూరి వీరబ్రహ్మేంద్రస్వామి ఆలయంలో శుక్రవారం బ్రహ్మంగారి ఆరాధనోత్సవాలు ఘనంగా నిర్వహించారు. వీరబ్రహ్మేంద్రస్వామి సజీవ సమాధి జరిగి, 331 ఏళ్లు పూర్తయిన సందర్భంగా నవగ్రహ పూజ, హోమం, బ్రహ్మంగారి సజీవ సమాధి ఘట్టం, పూజా కార్యక్రమాలను కో టగిరి ప్రవీణ్‌ శర్మ చేపట్టారు. ఆలయ కమిటీ సభ్యులు కస్తూరి నరేంద్రాచారి, మునిగంటి నాగరాజు, రావుల వేణు, తేలుకుంట్ల వేణు, శ్రీను, రావుల భిక్షపతి, స్వర్ణకార సంఘం, మనుమయ సంఘం సభ్యుల ఆధ్వర్యంలో ఏర్పాట్లు చేశారు. స్వర్ణకార సంఘం అధ్యక్షుడు గుగ్గిల రాజేంద్రప్రసాద్‌, పొన్నోజు సుధాకరాచారి, రంగు పండరి, వలబోజు రాంబాబు తదితరులు పాల్గొన్నారు.

కరీంనగర్‌రూరల్‌: రైతులకు వరిపంట పండించడం ఒక ఎత్తయితే, కొనుగోలు కేంద్రాల్లో ధాన్యం విక్రయించడం మరొక ఎత్తవుతోంది. అకాల వర్షాలు కంటిమీద కునుకులేకుండా చేస్తున్నాయి. గురువారం సాయంత్రం, రాత్రి వేళల్లో కురిసిన వర్షంతో శుక్రవారం కరీంనగర్‌ మండలంలోని పలు కేంద్రాల్లో ధాన్యం కొనుగోళ్లు నిలిచిపోయాయి. చెర్లభూత్కూర్‌, జూబ్లీనగర్‌, దుబ్బపల్లి గ్రామాల్లోని కేంద్రాల్లో నిర్వాహకులు కాంటా పెట్టలేదు. రైతులు తడిసిన ధాన్యం ఆరపెట్టేందుకు పడరానీపాట్లు పడుతున్నారు. ధాన్యం కుప్పలపై కప్పిన టార్పాలిన్లను తొలగించి ధాన్యం ఆరపెట్టారు. తేమ ఎక్కువగా ఉందంటూ కాంటా పెట్టకపోవడంతో అకాల వర్షాలకు ధాన్యం తడిసిపోయిందని పలువురు రైతులు ఆరోపిస్తున్నారు. నగునూరులో గురువారం కురిసిన వర్షానికి 1500 బస్తాల లోడింగ్‌ నిలిచిపోయింది. శుక్రవారం కాంటా పెట్టడంతో మొత్తం 3500 బస్తాలు, వ్యవసాయ మార్కెట్‌లో 2వేల బస్తాలను హమాలీలు లారీల్లో లోడింగ్‌ చేసి పంపించారు. అయితే వర్షాలకు ధాన్యం తడవడంతో పాటు ఆలస్యంగా వరికోతలతో ధాన్యంలో తేమశాతం ఎక్కువగా ఉండటంతో జూబ్లీనగర్‌, దుబ్బపల్లి, చెర్లభూత్కూర్‌లో కాంటా పెట్టడం లేదని కరీంనగర్‌ సింగిల్‌విండో సీఈవో రమేశ్‌ తెలిపారు. కొనుగోలు కేంద్రాల్లో నిలిచిన కాంటాలు